مش عارفه ليه اول ماسمعت نتيجة التعديلات الدستوريه الجديدة جت في بالي اغنية ليلي مراد اللي فيها بتقول داستور ياسيادي ..انا جيت في ميعادي هو صحيح الواحد اخد خلاص علي نظام الكوسه والرشوة وتزوير الانتخابات والمحسوبيه ...الي اخرة ..بس بصراحة البجاحه مش للدرجه دي وافتكرت بردو تعبير لوست بتاع دي مؤامــــــــــــــــرة كونيه يعني انا عمري ماكنت من انصار نظرية المؤامرةبس بقي لما الاقي شييييييييييييييخ الأزهر اللي كلامه يعتبر فتوي شرعيه _وحسبي الله ونعم الوكيل _ يجي يقولي مقاطعة الاستفتاء على التعديلات الدستورية في مصر من قبيل «كتمان الشهادة» المستهجنة شرعا، يبقي الرد المنطقي والطبيعي علي كلام زي دا لازم يكون في كلمة اعتراض مكونه من تلات حروف ولما يقولي الايه بتقول «ولا تكتموا الشهادة ومن يكتمها فإنه آثم قلبه» يبقي كلمة الاعتراض هنا لازم تكون أس اتنين طب مااحنا اعترضنا ورقعنا بالصوت الحياني وقولنا لا للتعديلات الدستوريه وبعدين اقوله بقي ان الايه دي تنطبق عليا وعليك يا عزيزي يعني ايه... يعني انت واسمك شيخ الازهر كتمت شهادة حق ربنا يحاسبك عليها... واستغليت صوت الدين عشان تحابي الحكومه وبعدين مش معني اني امتنعت عن التصويت اني كتمت شهادتي الموقف معلن وصريح اننا اخدنا موقف وقولنا لا ودا اعلان شهادة مش كتمها او اختيار اني اعبر عن شهادتي بطريقه اخري وبعدين ما الدستور الجديد بيتحفظ علي المرجعيه الدينيه في مباشرة العمل السياسي وبالنص بيقول لا تجوز مباشرة أي نشاط سياسي أو قيام أحزاب سياسية على أية مرجعية أو أساس ديني طيب هو كلام شيخ الازهر وتصريحاته دي مش تعتبر مرجعيه دينيه في النشاط السياسي وللا هو عشان هنا المرجعيه موظفه لخدمة اغراض الحكومه السياسيه تبقي حلوة ولو كانت معارضة _زي الاخوان مثلا _تبقي كخه... شويه شويه هايطلع يقولنا زي اسمه ايه دا في فيلم الزوجه التانيه اللي كان عمال يقول (وأطيعوا الله والرسول وأولي الأمر منكم) والنبي انا عارفه انه لولا الملامه كان ممكن يقولها
بلاها شيخ الازهر ... نيجي لنظام الهلس والتهريج ونشوف مثلا حظك اليوم بتاع جريدة الاخبار لما نلاقي معظم الجرايد منزله في حظك اليوم مثلا كلام زي (كثيرا ماتبدع في افكارك الجديدة خاصة فيما يتعلق بالوطن) ونلاقي كمان عبارة بتقول (حب الوطن هو اغلي حب) وشويه شويه نلاقي مصر يا اول نور في الدنيا شق ظلام الليل ...وسمعني السلام الجمهوري يا جدع
بجد دي فعلا مؤامرة كونيه بيستغل فيها كافة الاسلحة المتاحه من دين وسياسه واعلام بكافة انواعه من اول الأغاني الللي خير اللهم ما اجعله خير كترت كدا فجاة وبعد ماكانت مصر يا اول نور في الدنيا ووطني حبيبي الوطن الأكبر ومصر اليوم في عيد ...بقت يبقي انت اكيد اكيد في مصر مرورا بنانسي _حتي انتي يا نانسي _انا مصري وابويا مصري وانتهائا بالجاسمي وبحبك وحشتيني طبعا ناهيك عن الافلام واعلانات الحزب الحاكم الصريحه وبرامج التليفزيون والراديون_دي حتي الاف ام والنعمه دخلت في الليله _ وانتهائا بعمو الفلكي بتاع الابراج ماشي من حق كل تاجر انه يعرض بضاعته بطريقه تجذب الزبون _مع الفارق في التشبيه طبعا_ بس من حقي انا كمان اني اخد فرصة مساويه أأقول فيها رأي حر او اعترض بصورة مقبوله من غير اعتبار اعتراضي دا نوع من انواع كتم الشهاده وابقي وحشه واخش النار
وفي النهايه طبعا_وبعد اعلان نتيجة الاستفتاء والذي شاركت فيه جميع فئات الشعب _ انا بصراحة مش لاقيه حلة محشي كوسه محترمه كدا عشان احطها صورة مناسبه للبوست دا فاللي عندة ياريت يقولي
والسلام عليكم ورحمة الله وبركاته
None
|
فكرتيني بنكتة يا دمعة
بيقولك مرة شيخ الازهر وحسني مبارك ووزير العدل حبيب العادلي واحمد نظيف
راحوا يصطادوا طير في العذبة بتاعت مبارك
حبيب العادلي جاب المسدس وطخ طخ طخ
نزل تلات نسور
جه احمد نظيف وطلع السنايبر وطخ طخ طخ
نزل تلات صقور
جه عمك مبروك وطلع المسدس بتاعه وطخ
طخ
طخ
معرفش يصيب الصقر وفضل لسه بيطير
راح طنطاوي قال
سبحان الله ----- طايرة وهي ميتة