انت ليه اخترت الاسم دا ؟
علشان كان بيعبر عن التوهان اللي كنت حاساه وقت ماعملنا البلوج.. بالإضافة لأننا كلنا اتفقنا عليه
ـــــــــــــ
undoلو تقدر ترجع الزمن مره واحده,تعمل لموقف ما,ايه الموقف اللي حتختار تشطبه من حياتك؟
أي موقف لغيت فيه عقلي ووأدت شخصيتي.. اقرب موقف كان مشروع خطوبتي الأخير
ـــــــــــــ
لو معاك طاقيه الاخفا,حتعمل بيها ايه؟
هممممم..ممكن تلات حاجات على بالي دلوقتي
أولاً:اسهر على قهوة بلدي في حي شعبي من بعد العصر ولحد الفجر.. اسمع حديت الناس والأغاني القديمة وصوت خبط الأشاط.. واشم ريحة المعسل والتفاح والمشاريب..الخ
ثانياً: أنام على ظهري وافرد ايدي على آخرها في وسط حديقة عامة, تحت ظل شجرة وعيني على السما, وناس رايحة جاية حواليا، وناس فارشين حصر وملايات وقاعدين يتحدتوا ويشربوا شاي، وعيال بتعلب كرة, وبنات بتلعب فتّحي ياوردة
ثالثاً: ارافق صياد ومراته في رحلة صيد نيلية على مركب بعد المغرب
ـــــــــــــ
تقدر ترجع بالزمن ليوم واحد بس,لاي وقت او يوم,ترجع لامتي و فين؟
لأي يوم من أيام سنة أولى ثانوي..آخر سنة ليا مع بابا
ـــــــــــــ
لو معاك مصباح علاء الدين,ايه التلات طلبات اللي حتطلبها من الجني؟
الحقيقة المطلقة
اليقين
عشرون مليار دولار
ـــــــــــــ
لو تقدر تعيش في شخصيه تانيه ليوم واحد,او حتى علي طول,تحب تعيش بدل مين؟
لو ليوم واحد يبقى الكاتب الأستاذ محمد علاء الدين
لو على طول ماعتقدش هقدر استحمل اكون غير أنا
ـــــــــــــ
نفس قدره ترجيع الزمن,حاجه حتعملها و انت مش قادر تعملها و خايف من النتيجه بتاعتها,معاك القدره دي,فتقدر تعملundo الحاجه دي و لو فشلت ببساطه تعمل ليهاو يا دار ما دخلك شر,ايه هي الحاجه دي
ترك عملي الحالي، والبحث عن عمل جديد
ـــــــــــــ
خمس حاجات محدش يعرفها عنك
أولاً: مابحبش صوت مشاري العفاسي في تلاوة القرآن
ثانياً: أنانية بعض الشئ
ثالثاً: محلات لعب الأطفال ومكتبات الأدوات المدرسية بتبهرني
رابعاً: بخاف من الظلمة
خامساً: كان نفسي أكون ولد
ـــــــــــــــــــــــــــ أمرر التاج لسمباتيك وذو النون المصري وعلاء الدين وكراكيب عادل و لوست هانم ..بعد إذنهم طبعاً :) Incomplete |
هو عدم اعجابك بمشارى راشد تهمه تخفيها ،لا انا ولا اخوتى ولا ابى ولا امى نحبه ولا نرى اى غضاضه فى التصريح بذلك
وبعدين عاوزه تكونى ولد ليه لو كت ولد صدقينى كنت تتمنى تبقى بنت