ساعات كتير بقعد افكر..ياتري ايه مميزات وعيوب انك تكون ام لتلات بنات تؤام
بالنسبه لي علي الاقل ..
اقدر اقول ان المميزات مثلا ..ان مابقاش فيه فراغ في حياتي ولا حتي دقيقه واحده ..لأنهم فعلا ماليين عليا حياتي جدا ومش بيخلوني افكر ياتري ايه اللي ناقصني ..او ياتري انا سعيده في حياتي ولا لأ ..
انا شايفه نفسي سعيده ..يمكن ناس كتير تتخض من فكرة التلاته التؤام ..بس انا لأ..
حتي لما عرفت وانا حامل اني حامل في تلاته ..كنت مبسوطه جدا جدا ..كل اللي حواليا كانو مخضوضين وخايفين عليا وعليهم لأن احتمالات اننا نبقي اربعه بعد عملية الولاده كانت قليله جدا ..بس انا كنت متفائله خير ...دي دعوتي اللي دعتها لربنا رمضان اللي قبل اللي فات . وحققهالي رمضان اللي فات ... اني اكون ام وبسرعه ..
كنت شايفه ومازلت ان ميزة الزواج الاولي اني اجيب اطفال وابقي ام ..علي رأي انيس منصور ..اعظم انجازات المرأة ان تلد طفلا .. يمكن عشان كدا اتجوزت بدري بدري ..عشن ابقي ام واستمتع بأحساس الامومه اطول فترة ممكنه
من اول ما اتولدوا ..حصلت ظروف عائليه كدا ملغبطه شويه خلت مامتي اتنقلت بلد تانيه..وبقيت انا لوحدي متحمله مسؤليتهم التلاته كامله من اول يوم اتولدوا فيه ..ولحد النهارده .
طبعا اللي كان يقولي من سنتين او تلاته اني هابقي كدا ..وهاقدر اتحمل المسؤليه دي كلها كنت اقول عليه يا مجنون يا بيهزر..يعني انا طول عمري وانا متدلعه جدا بحكم اني وحيدة بابايا ومامتي ..اصلا ماكنتش متخيله اني لما هاتجوز هاقدر اشيل مسؤلية بيت.. اكتشفت من خلال تجربتي معاهم ..ان مسؤليات الام بتبقي مزروعه جواها بالفطرة يعني لقيت نفسي مابين يوم وليله بعرف ااكلهم واشربهم واغيرلهم واحميهم وانيمهم ..وكأني قضيت عمري كله بتدرب علي الحجات دي
وعشان كدا اقدر اقول ان تاني ميزة اني اكتشفت في نفسي قدرات ماكنتش اعرف انها موجوده
تالت ميزة بقي احساسي وانا بتفرج علي نفسي فيهم ... بابقي مستمتعه جدا مثلا لما الاقي مروج مثلا بتغني قبل ماتنام اوبتعيط لما حد بيعلي صوته او يشخط فيها..او الاقي مريم لما بتعيط وتتأمص تروح مخبيه وشها بأديهااو لما تبقي مبسوطه تفضل تهز في رجليها وهي نايمه
او اشوف ملك وهي قاعده بتلعب هاديه كدا مع نفسها في منتهي الروقان والاستمتاع
اهم ميزة بقي ... اني فعلا بقيت خبيرة في تنظيم الفوضي وفك الاشتباكات العنيفه وخاصة تلك التي تنشئ نتيجة الخناق علي لعبه او مين اللي ينام علي رجلي
وخبيرة بردو في حل المشاكل الناجمه عن تلك الخلافات بأقل خسائر ممكنه وايجاد حل يرضي جميع الاطراف المتنازعه
ميزة كمان..اني بربي نفسي معاهم من الاول ....يعني مثلا لما بصلي او اقرأ قران والاقيهم منتبهين ليا ومراقبين التصرف دا بحاول اني اعمله قدامهم دايما عشان يتزرع جواهم من صغرهم .. العكس مثلاوانا بدخن والاقيهم منتبهين بردو للتصرف دا ..بقيت بقلل التدخين قدامهم بقدر الامكان وباتمني اني ابطل لما يكبروا .. يمكن فكرت لو واحده منهم طلعت بتدخن زيي لما تكبر..مش عيزاها تطلع كدا لمجرد انها تقلدني او لمجرد اني كنت قدوة سيئه لها ..يمكن هايكون اسهل عليا لو كنت انا مش بدخن لأني ساعتها كنت هاقول دا قرارها ولها حرية القرار وعليها انها تتحمل تبعيات واضرار القرار دا..بس في جميع الحالات طبعا دي حاجه هاتضايقني لأني هابقي خايفه عليها وعلي صحتها ..وبقيت اعذر مامتي في تصرفتها لما بتضايق لما بدخن ... الصراحه بقيت اعذرها في تصرفات كتير كانت بتعملها معايا وعرفت لما بقيت ام انها كانت من منطلق الخوف عليا في المقام الاول ..
ويمكن دي ميزة تانيه لكوني بقيت ام ..اني قربت من مامتي اكتر هو طبعا احنا طول عمرنا انا وهي اصحاب جدا .. بس دلوقتي فهمت يعني ايه حد انت بتخاف عليه اكتر من نفسك وبتتمناله ان يكون احسن منك وقعلا بقيت بحبها اكتر وبودها اكتر من الاول
امــــــــــــــــــــــــــا عن العيوب ..فطبعا طبعا ..بغض النظر عن التعب وهدة الحيل ..وقلة عدد ساعات النوم واللي بينتج عنها المزيد والمزيد من العصبيه ..والضغوط اللي بتخاليني احيانا ممكن اخنق اللي يقولي صباح الخير .. والعشرة كيلو اللي زدتهم عن معدلي الطبيعي
بس العيب الخطير احساس اني بتلاشي فيهم ..يعني انا بقيت حياتي كلها عيشاها علشانهم ونتج عن دا تضحيات كتير ..اولها اني قعدت في البيت ومكملتش دراسة الماجيستير بتاعتي ودي حاجه مضايقاني جدا ..وطبعا مابقتش العب رياضه ودي بردو حاجه مضيقاني جدا ..ولا بخرج وبشوف ناس ودي حاجه مضيقاني جدا جدا .. يمكن الحاجه الوحيده اللي محتفظه بيها من هواياتي القديمه اني بقرأ ..بس عندي امل ان كل دي حجات مؤقته ولما يكبروا شويه اكيد هارجع تاني لحياتي اللي بحبها
واحساس اني اعيش مع نفسي حتي لو في ناس حواليا دا من العادات اللي مفتقداها جدا .. دلوقتي معنديش وقت اعيشه مع نفسي ولنفسي زي الاول .. دايما دماغي مشغوله بيهم وعليهم حتي وهما نايمين
طبعا لو فضلت اتكلم مش هابطل رغي للصبح ..
اللي اصلا كنت عايزة اقوله اهم من الكلام دا كله ..ان النهاردة عيد ميلادهم ..كل سنه وهما طيبين ..وكل سنه وهما ماليين عليا حياتي ..حتي لو كنت ساعات بحس ان حياتي هاتضيع معاهم وليهم ..فكل دا مش مهم لأنهم فعلا اغلي من حياتي
none قبل ما انسي ..الصور بالترتيب من فوق لتحت ..الانسه ملك يليها الانسه مريم ثم الاخت مروج |
ربنا يهديكي