تاج جاني من انكومبليت ..الملاحظ طبعا اني بتدبس في التاجات دي من اصحابي الواتيين اللي المفروض انهم عارفين اني مش بحب اسئلة التاجات ..بس ياللا بقي نعمل ايه !!المهم..نبتدي
أحب شخص لقلبك في الدنيا؟
مامتي وبناتي
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
انسان مستعد تضحي بحياتك عشانه و ركز في كلمه حياتك عشانه؟
هو عموما انا اقدر اقول اني انانيه شويه في مشاعري ..يعني مشاعري مابتخرجش بسهوله غير لناس معينه..وبناء عليه بردو شايفه ان اللي ممكن بجد اضحي بحياتي عشانهم فعلا مش مجازا..هما ماماوبناتي
ـــــــــــــــــــــــــــــــــ
انسان كرهته لدرجه الجنون و تمنيت لو تمسك سكينه و تنقض عليه و
تغرزها في قلبه تقتله و تقف تبص لجثته و تشفي غليل قلبك؟
مش عارفه..بس عمومااللي ممكن يوصلني للدرجه دي من الكره ممكن يكون
الذئاب البشريه اللي بيغتصبوا الأناث .. اي شخص يقوم بأي انتهاك جسدي عموما لأي فرد سواء ذكر او انثي.. واي حد بيحاول يلغي ادمية اي انسان مستخدما في ذلك اي اسلوب من اساليب الضغط زي المخدرات مثلا _يعني مش قصدي تجار المخدرات او اللي بيتعاطوها عموما قد ماقصدي الناس اللي ممكن تستخدم المخدر للسيطرة علي شخص ما وجعله خاضع ليهم ولسيطرتهم _
ــــــــــــــــــــــــــــــــــــ
ماهو اسم اجمل كتاب كتبه بشر قرأته و مازلت محتفظ به حتي الأن؟
يااااااااااااااااه كتير اوي اوي ..يعني مثلاعلي سبيل المثال لا الحصر حول العالم في 200 يوم وكتب انيس منصور عموما ..كفاحي لهتلر ..كتابات عائض القرني ..عيسي ابن الانسان لجبران خليل جبران ..كتب الميثولوجيا عموما وبالذات اليونانيه والبابليه والفرعونيه..كتابات د. احمد خالد توفيق عموماونجيب محفوظ واحسان عبد القدوس ..كتب مقارنة الاديان والفلسفه وعلم النفس
مجلات ميكي . تشارلز ديكنز وشكسبير وسارتر.وحجات تانيه كتير كتير
ـــــــــــــــــــــــــــــــــــــــ
اهم جهاز منزلي انت متعلق بيه او بتستخدمه كتير؟
الكمبيوتر طبعا ..
ـــــــــــــــــــــــــــــــــــــــــــ
..مكان تحس بالراحه عندما تدخله؟
المساجدالكبيره عموما وبالأخص مسجد النور والجامع الازهر..بيتنا هنا وعند ماما ..وارض عمي في البلد
ــــــــــــــــــــــــــــــــــــــــ
..شئ تحس بالراحه النفسيه عندما تنظر اليه؟
بناتي ..والنيل والبحر ساعة الشروق مش الغروب ..مناظر الخضرة والزرع والاشجار الكبيرة عموما (بصرة يا انكومبليت )
ــــــــــــــــــــــــــــــــــــــــ
مكان تحس فيه بالحنين و ذكريات جارفه متعلقه بيه؟
محطة مصر ..المطار
ــــــــــــــــــــــــــــــــــــــــ
..اجمل مدينه زرتها داخل مصر
اسكندريه وشرم الشيخ والعريش بالترتيب
ـــــــــــــــــــــــــــــــــــــــــــ
..اجمل مكان طبيعي رأيته في مصر
البحر والخضرة والنيل بالترتيب بردو
ــــــــــــــــــــــــــــــــــــــــــ
اكتر شخصيه كرتونيه بتحبها؟
بطوط بطوط بطوط وميكي وتوم جيري وسلاحف النينجا القديمه
ــــــــــــــــــــــــــــــــــــــــــ
نوع هاتفك المحمول؟
نوكيا 6103
ــــــــــــــــــــــــــــــــــــــــــ
سرعه بروسيسور جهازك؟
تقريبا كدا والله اعلم يعني وعلي حسب مابسمع ..انه 2.2 جيجا
ــــــــــــــــــــــــــــــــــــــــ
حجم ذاكره هارد جهازك؟
160 جيجا
ـــــــــــــــــــــــــــــــــــــ
المساحه التي تشغلها المواد الاسلاميه علي جهازك؟
20 جيجا
ــــــــــــــــــــــــــــــــــــ
نفس المساحه السابق ذكرها في قلبك الاجابه لنفسك عشان الرياء يااخوانا
طب لزمته ايه السؤال بالذمه.. عموما حتي لو كان المفروض اني اجاوب ..كنت مش هجاوب علي السؤال دا بالذات لأن الايمان حاجه في القلب ومابحبش حد يدخل فيها
ـــــــــــــــــــــــــــــــــــ
اهم هدف انت واضعه لحياتك الاّن؟
اني اربي بناتي كويس ..احافظ علي بيتي عموما بس من غير ما انسي نفسي او اهمل حقها عشان ما اضيعش مني
ـــــــــــــــــــــــــــــــــــ
مواصفات فتى الأحلام بالنسبه لكي ؟؟
هو سؤال متأخر قوي !!
كنت اسأله بدري تلات سنين وانا اجاوبك
ـــــــــــــــــــــــــــــــــــــــ
شعورك لما بتسمع كلمه مصر؟
بطلت اتابع متشات الكورة من زمااااان !!
ــــــــــــــــــــــــــــــــــــــــ
شعورك لما بتسمع كلام عن اليهود؟
اليهود عادي مجرد اختلاف عقائدي مش من حقي اني احاسبهم عليه لأننا في الاخر كلنا بنعبد رب واحد وربنا اللي هايحاسب الجميع مش احنا ..يمكن بس بكره الاسرائليين العنصريين تحديدا والصهاينه
ـــــــــــــــــــــــــــــــــــــــ
شعورك لما بتشوف ظابط شرطه؟
بصراحه كان الاول عادي ..دلوقتي حساهم توحشوا وافتروا علي مخاليق ربنا وغصب عني باخد موقف عدائي والاقي نفسي متحفزة اني اتخانق واقلب الدنيا لو اتكلم معايا نص كلمة..ولو اتهور بقي وقرر انه يعاكسني _وهما اكتر ناس بيعاكسوا وبيبصوا بصات مش كويسه عموما لأي حاجه مؤنثه ماشيه في الشارع_ ممكن اتهور ارد _رغم ان مش طبعي اني اعبر اللي بيعاكسوا يعني _ بس عشان احرق دمه واخليه يتكسف لأنه المفروض يحمينا مش يعاكسنا ..!!
ـــــــــــــــــــــــــــــــــــــ
شعورك لما بتشوف الكناس العجوز في الشارع؟
الكناس العجوز والبائع العجوز اللي بالعربيه الكارو بالذات في عز الحر او عز البرد ..بيبيقي نفسي المهم كلهم وادخلهم البيت أأكلهم وانيمهم واعمل كل اللي اقدر عليه عشان اريحهم ..وياسلام بقي لو بجانب الحر او البرد حسيت انه تعبان كمان ولا يقوي علي العمل ..والنعمه ممكن لو نفع وظروفي سمحت اتكفل بيه ..لو ماسمحتش ودا الواقع طبعا بيبقي هاين عليا اقعد اعيط جمبه وبافضل اشتم في البلد وفي أولاده وفي الظروف اللي تخلي واحد زيه محتاج للراجه انه يطلع تلاتينه بالمنظر دا
ــــــــــــــــــــــــــــــــــــــ
افكارك تجاه شاب ماشي في الطريق لابس جلابيه بيضاء قصيره و عمامه وله لحيه و بجيبه السواك و بيده المصحف؟
بصراحه شديدة جدا ومن غير ما ازعل حد مني ..كنت الاول بافرح بيهم قوي ..واقول الشباب المسلم اللي هايحرر القدس ..بس طبعا بعد ما قربت وحصل صدام بينا في ارض الواقع اكتر من مرة مع اكتر من شخص ..اكتشفت انهم ناس عاديين ليهم غلطاتهم زيهم زينا ..بس المشكله ان فيهم اللي منصب نفسه قاضي وجلاد وشايف نفسه ناس غير الناس وبيحكم علي الناس وعلي مدي ايمانهم وهو في الحقيقه له غلطاته اللي ممكن تكون ابشع الف مرة من الغلطات العاديه اللي بيرتكبها الناس ناسي ان ربنا بيقول "اتأمرون الناس بالبر وتنسون انفسكم " وحجته في كدا غالبا بتكون الأمر بالمعروف والنهي عن المنكر !!
بعد ماقربت منهم للأسف وكل اللي عرفتهم واللي حظي الوحش وقعني فيهم منهم بلا استثناء مدعين وكاذبين ..وحصروا الدين في مجرد زيي وكلام بيقولوة عن مدي حرمانية تصرفات الناس ونسيوا جوهر الدين الحقيقي وتصرفاتهم هما ..ومعظمهم بيعمل غلطات كبيرة بس بيخفيها عن الناس عشان مايبقاش مجاهر بالمعصيه ..!!
طب الاولي اننا نخاف ربنا ولا الناس !!
عموما انا رأيي دا عن تجارب شخصيه جدا شوفتها وعشتها مع اكتر من حد قريب مني ..يعني مش بطلق عليهم الحكم ...
بس اكيد في منهم ناس كتير كويسين جامعين في الالتزام مابين الشكل والمضمون بس انا حظي اللي وحش يمكن وماشفتهمش ..
عموما ربنا يهدينا جميعا
ــــــــــــــــــــــــــــــــــــــــــــــ
احساس يراودك في اشاره مرور مغلقه بسبب مسوؤل كبير؟
أمــــــــــــــــــــــه علي رأي انكومبليت .. انا بالذات طريقي لكليتي كان بيمر بطريق النصر والمنصه ..فطبعا طبعا ..لك ان تتخيل مدي الحقد والغل الدفين اللي متراكم من ايام ما كنت بتأخر علي المحاضرات وماادخولهاش..ومن ايام ما اتأخرت مرة علي امتحان الترم وكنت مش هادخله لولا ان المتأخرين كانو كتير فدخلونا رأفة بحالنا بس طبعا متأخرين نص ساعه عن وقت الامتحان اللي زمنه كان علي قد الاسئله بالثانيه...
طبعا بتخيل كم الناس اللي مصالحها متعطله بسبب معاليه ..وبفضل اتخيل مع نفسي كزيادة في شحن بطارية الغل الدفين ان الناس دي اكيد فيها العيان واللي عايز يروح شغله واليوم هايتخصمله .وطبعا هو محتاج كل جنيه في المرتب عشان مراته واولاده..واللي مصالحه متعطله ..واللي هيتأخر علي معاد القطر او الطيارة ..
بيبقي هاين عليا انزل اجري ورا العربيه بتاعته واحدفه بالطوب واكسرله ازاز العربيه ..وطوبه تيجي في نافوخه تبطحه ..بس للأسف ليس كل مايتمناه المرء يدركه :(
طبعا في النهايه انا مش عارفه امرر التاج لمين ..لأن معظم اللي اعرفهم جابوا عليه ..بس عموما هو موجود ومن حق اي حد انمه ياخده ويجاوب عليه
يا اخت انكومبليت ..معظم الاسئله كان نفسي اعمل لها كوبي وبيست كان هايبقي اسهل ..وعموما مش عارفه اقولك ايه غير ان
التشابه في وجهات النظر لا يفسد للود قضيه ..
هاتي بوسه
None
|
كل تاج و انتي طيبة
انا مليش في التاجات دي خالللللص
الميموري 160 جيجا
ده كده يبقى نملية ههههههههههه
تحياتي