أختى وحبيبتى وصاحبتى
امى وبنتى ونور عينى

لاول مرة بجد مش عارفه اكتب كومنت
عارفه لما تحسى بالعجز
انك نفسك تعمى ميه الف حاجة فى بعض
ومش عارفه حتى تفكرى

بجد انتى دايما كنتى بتقفى جنبى وبتقوينى
ولولافضل ربنا وجودك فى حياتى انا كان ممكن يحصلى حاجات كتير اوى وحشه

تعرفى ان رغم معارضتى ليكى فى احيان كتير
لكن فى جوانب تانيه كتير انا واخدكى ليا قدوة

دماغك اللى نفسى اكسرها ليكى بحبها رغم عندها
تلقائيتك دى رغم معارضتى ليها بس بحس انك طفله بجد

اوعى تلومى نفسك انك كنتى قدوة فى حاجة غلط كل واحد عنده عقله واكيد احنا كبار كفايه اننا نعرف الصح من الغلط

احيانا كتير التجارب اللى بنمر بيها والبحر والغرق بنتعلم منه اوى
انتى مش دايما تقوليلى احنا بنغلط علشان نتعلم

انا فعلا على اد ما صاحبت وشفت وعرفت بنات محبتش حد زيك
ومش لسه هقول من جديد انك اختى وانك بجد كل حد ليا فى حياتى بعد ربنا وامى
لما بلجأ اول حد بفكر فيه انتى
ولما اتخانقت فى الشارع اول امبارح اول حد اتصلت عليه انتى
بحس انك طوق النجاه ليا
انتى قويه
وانا قويه بيكى
ياريتنى اقدر افضل جنبك ومعاكى
انا كارهه انى هتجوز
مش متخيلانى مش بشرب الصبح النسكافيه معاكى
ولا العك اللى بنعكه فى المطبخ سوا
خروجاتنا جنانا خناقنا اللى بحبه
حضنك اللى دايما محتاجه
اوقات بحس انى نفسى احضنك من غير سبب
يمكن بحس با الامان
بحس انى مش لوحدى فى الدنيا دى

انتى حد محصلش بجد
واد ايه انا بحبك وبحترمك وكنت بتمنى اكون ولو زيك فى اى جزء منك :)

انتى قويه بيه ومن غيره
معاكى ربنا وبناتك اللى ربنا يخليهوملك

يالهوى كل دا كلام
انا عايزة اقولك انى لسه بردوا مش عارفه اعلق
هرجعلك تانى

ربنا يخليكى ليا

 

تحياتي

عسي ان تكرهوا شيئا و هو خير لكم...

عسي ان تكرهوا شيئا و يجعل الله فيه خيرا كثيرا.

الانسان قوي بالله اولا....قوي بنفسه...بذاته...بقدراته....قوي بمن حوله من اهل و اصدقاء اوفياء حتي لو كانوا قلة قليله.

عطري فمك بذكر الله...و قلبك بنور اليقين...و الله هو نعم المولي و نعم المعين.

تحياتي...و تقديري...اليك ياقوية بالله
و يا معتزة بنور طاعته.

 

none حبيبتي
مش عارفه أقولك ايه..بس انا هرد على كل جزئية بكلام من قلبي.. ويمكن يكون تعليقي أكبر من البوست
انا مش هعمل نفسي حكيمة أو فاهمة الدنيا صح وادي نصايح وكلام على ورق.. بس هتكلم عن قناعاتي من واقع اللي عايشته..وتقريباً انت شفتيني في اغلبه ويمكن عايشتيه معايا
موضوع البدائل ده..اياً كان خيارك هيجي وقت وتندمي عليه وتقولي ليه ماختارتيش حاجة تانية..يعني كل الخيارات فيها ندم..فماتلوميش نفسك..خيارك هو الأفضل دايماً مش علشان هو الصح .. لأ علشان انتي اختارتيه
عارفه ان احنا دايماً بنبص للي مش في ايدينا ونندم عليه.. بس لازم برضو مانستسلمش لكده ونبص للي في ايدينا قبل مايجي يوم تاني ويبقى مش في ايديناونندم عليه
بالنسبة للناس.. الغلط انك تكوني زي ماهما عايزين وماتكونيش نفسك ..بس مش غلط انك تعاملي كل واحد على قد دماغه.. مش قصدي نفاق أو تناقض أبداً.. بس هديكي مثل افتراضي علشان أوصل لك اللي اقصده.. هاتي واحد صعيدي جاي من الصعيد حالاً أمّي لا بيقرا ولا بيكتب وشغال حرفي مثلاً..وحاولي تفهميه أو تكلميه عن حق المرأة واضطهاد المجتمج الشرقي ليها وتعاملهم مع على أساس جسدي شهواني في المقام الأول.. تفتكري لو قعدتي تشرحي في حاجة زي كده لحد زي ده ممكن ولو بعد سنة يفهمك؟؟
طبعاً شبه مستحيل ..وده مش معناه إني لاسمح اللي بقلل من شأنه أو بستحقر عقليته.. بس هو دماغه كده.. اتبرمجت على اللي اتربى عليه وعلى اللي شافه في مجتمعه وعلى البيئة اللي طلع منها
..الخلاصة أنا أقصد انك مش مطالبة انك تبرري شخصك أو نفسك للناس ..وفي نفس الوقت تعرفي دماغ اللي بتتعاملي معاه وتحاولي عدم الإصطدام معاه في نقط الخلاف اللي ممكن تكون كثيرة.. مش علشان خايفه منه ولكن علشان تشتري دماغك وتريحي نفسك من صدام ممكن يجرحك على قلة فايدة.. كل ده بما لايمس قناعاتك أو ثوابتك.. وخلي بالك انا قلت اللي بتتعاملي معاهم مش الناس في المطلق.. الناس في المطلق مالهاش حاجة عندك
وكونك بتفكري كويس قبل ماتقدمي على اي تصرف أو قبل ماتقولي أي كلمة دليل على انك بدأتي تتعلمي فعلاً من تجاربك السابقة وانك بقيتي أكتر حكمة وأقل رعونة وده مش عيب أبداً
الوحدة اللي انتي حاساها سببها الخوف من نفسك.. انت عايزه دايماً حواليكي ناس علشان تهربي من مواجهتها-نفسك يعني-..علشان يحسسوكي بالزحمة اللي تلهيكي وتشغل وقتك وتنسيكي نفسك.. علشان تستمدي القوة منهم..علشان خايفة ومش بتثقي في نفسك
ياحبيبتي.. لازم تحبي نفسك..ولازم تثقي فيها ..ولازم تكوني قوية من جواكي..لازم قوتك تكون نابعة منك مش من اللي حواليكي..كلنا جوانا قوة مش بتطلع الا لما نثق في نفسنا ونحبها ونديها حقها ونؤمن بقوتهاوقدرتها
ليه بتفترضي فيها الضعف وليه خايفه منها.. اديها فرصة..قولي انك واثقه منك وانك مش خايفه من اي ضعف وتعاملي مع نفسك على هذا الأساس وصدقني هتبهرك النتايج.. وهتلاقيكي أقوى من ما كنتي تتخيلي
ياحبيبتي.. انت عارفه اني المفروض اعرفك كويس..وانا والله مش هاجاملك لما اقولك انت حد كويس قوي والله..يوم مابتغلطي بتعرفي انك بتغلطي وبتقفي مع نفسك حتى لو متأخر.. الغلط خلاص حصل.. هتحاسبي نفسك عليه علشان ماتقعيش فيه تاني..وادي نفسك فرصة تثبت لك انها مش هتفع فيه تاني..ثقي فيكي وقولي انا مش هعمل كده تاني علشان انا مش عايزه اعمل كده تاني.. ماتحاسبيش أو تحكمي على نفسك بانها هتفضل تقع في نفس الغلط على طول الخط علشان وقعت فيه قبل كده..ماتحكميش عليها بالضعف علشان ضعفت قبل كده.. صدقيني انتي اقوى من كده بكتير بس ادي نفسك الفرصة
وانا برضو كحد يعرفك بشوفك كتير مستسلمة لنفسك وبشوفك كتير بتعومي الحقائق أو تتحايلي عليها..وكلنا بنمر في اوقات كتير بالوضع ده..علشان الإنسان خلق ضعيف.. بس صدقيني يوم ماهتقدري تقعدي مع نفسك قعدة تحددي فيها الحقائق مجردة..ساعتها ممكن تتوجعي علشان مش هتلاقيها على هواكي.. بس صدقيني هتكوني في قمة السعادة والرضا عن نفسك بعد كده لما تتخلي عن هواكي..وبجد مافيش هاجة ممكن تسعدك قد حبك لنفسك لما تلاقيكي قوية
لازم نقعد مع نفسنا قعدة زي دي من وقت للتاني
مش عارفه.. بس انا تقريباً حاسة اني اعرف كل حد بتتكلمي عليه في البوست بحكم معرفتي بيكي
الحبيبة none
ناس كتير قوي بتحبك وانا منهم.. محدش بيحب حد وحش.. ارمي اللي عدا ورا ظهرك.. خدي بس منه دروس..تعمليها قواعد تكتبيها في الهامش علشان ماتقعيش في نفس الغلط تاني.. وابتدي صفحة بيضا جديدة مع نفسك.. وثقي انك هتمليها كأروع مايكون
أنا واثقة فيكي أرجوكي انتي كمان تثقي فيكي
:)

 

محتاجة تتصلحي مع نفسك
تحبيها
تسمحيها
و تصحبيها

متحرمش منك

 

بالنسبه للكتاب الموجود في مدونتي الان
هو مسرحيه بعنوان الحضيض تاليف مكسيم جوركي
من اصدارات الهيئه العامه لقصور الثقافه
سلسلة افاق عالميه
العدد 34
شهر ابريل 2004

 

بالنسبه للبوست و تعليقي عليه
لولا اني مشغول كنت اعلق علي كل جزئيه منه علي حده لانه دسم جدا هذه المره
لكن باختصار اقول ان مشاعر تنتابني كثيرا فعلا بان ما مضي افضل مما سياتي
لست سلفيا ممن يؤمنون بان علي الخلف ان يسير علي خطي السلف الخ
لكن هي مجرد مشاعر نفسيه تقابلها عندي قناعات عقليه بعدم صحتها وهذه القناعه هي التي باعدت بيني و بين الانتماء الي التيار السلفي
لكن هذه المشاعر ربما يكون سببها ان الفرد منا لا يشعر بقيمة ذاته و لم يحقق ذاته بصوره ترضيه حتي الان
لا يوجد فرصه للانجاز تشعرنا باننا موجودون في هذه الحياه و لنا فيها قيمه
.........
كثير و كثير جدا مما يمكن كتابته في هذه النقطه
لكن انا حاسس ان المشكله كبيره جدا بصوره لا يمكن قصر النقاش فيها في بوست واحد
........
موضوعك جميل جدا
تحياتي

 

علي فكره التعليقات عندك طويله جدا لان الموضوع واضح انه متميز

 

السلام عليكم ورحمة الله وبركاته
انا الحمد لله رجعت الناهرده ...وجيت امسي علي الاخوات الفضليات
انا مقراتنش الموضوع للاسف لضيق الوقت وببعت السلام للناس علي الشات
بس ملقتش عندكم شات بقي قلت ادخل ارمي السلام
عاوز اطمن عليكم كلم يا جماعة
والله كلكم وحشتوني واللي انتوا عملتوه في غيابي بجد مش هيتنسي ابدا من كل واحد افتكرني في غيابي

سلام

 

عزيزتى
حاسه ان البوست فى كتير جدا من الواقع
حاسه انه بيعبر عن ناس كتير
كل واحد هيقراه متأكده انه هيلاقى نفسه فى جزء منه
اى كان الجزء لكن أكيد هيلاقى نفسه فيه
ومع ذلك نفسى يكون أغلبه غير حقيقى
أو حتى لو كان حقيقى نفسى بتغير
لان نفسك هو انتى
لازم تحبيها علشان تحبك
وتصالحيها علشان تصالحك
وتذوبى فيها علشان تسعدى بيها
مش قادره أديكى تعليق تفصيلى على البوست حاليا
بس أتمنى تكونى بخير على طول
واتمنى ليكى كل السعاده
محبتى

 

عزيزتي
None
يمكن زي ماقالت ريمو
كل واحد او واحده بيقري البوست ده بيحس ان فيه جزء منه كأنه بيوصفه انا لما كنت بقري البوست ده لاقيت حاجات كتيره من نفسي فيه
اد ايه ساعات بكون حاطه لنفسي شخصيه معينه و معايير بمشي عليها بس ساعات بتحط في مواقف معينه بلاقي نفسي بعمل حاجات ساعات بتكون عكس اللي بكون مقتنعه بيه
طبعا ماقدرش اقول اني بعملها غصب عني بس ساعات الواحده مننا بتختار حاجات في مواقف معينه عشان الناس اللي بتحبها مش عايزه تجرحهم و لا تزعلهم
كتير بخاف من ردود افعال الناس علي حاجات معينه انا مقتنعه بيها و علي اد مابكون فخوره برأيي و باللي بعمله بحاول اني مااعملش تصادم مع حد حتي لو انا مش مهتميه بيه لأني بحس انها معركه خاسره
زي ماقلتي فاقد الشئ لا يمكن يعطيه لحد
بتمني كتير الاقي الانسانه اللي تتحس بيا بجد و اقدر اقول عليها صديقه صدوقه و نكمل سوا بس في وشوش كل الناس اللي قابلتها فيه حاجات كتيره ساعات مش بتعجبني و فيه اكيد حاجات بحبها فيهم اوي
بقول ستوب و بتكلم مع نفسي و اقول ان اكيد انا كمان مش كامله و اكيد فيه فيا حاجات كتيره ممكن ماتعجبش الناس و الناس اللي انا بستغلسهم ممكن كمان هما يستغلسوني بحاول اني اتقبل الناس زي ماهما عشان يتقبلوني زي ماانا
زمان كنت اوحش من دلوقتي في النقطه دي بس انا حاسه اني دلوقتي بقيت احسن شويه من زمان
بقيت متقبله الناس اكتر بقيت كوول اكتر في التعامل مع الناس
و بحاول اني ابص لعيوبي قبل ماابص لعيوب الناس عشان احسن من نفسي و احبها عشان اقدر احب الناس
البوست بتاعك لمسني اوي اوي عزيزتي و خالاني اتكلم بصراحه
بشكرك علي البوست المعبر
و تقبلي تحياتي و مودتي
:))))

 

السلام عليكم
طبعا الموضوع اكبر من ان نعلق عية تعليق والسلام لان كل حاجة فيه محتاجة تعليق خاص ياريتك كنتى فصلتى المواضيع فى اكثر من تدوينة
واضح انها تجربة شخصية انت وهى ونفسك اما الذى بينك وبين نفسك فهذا بيننا وبين انفسنا جميعا هذا الذى نرجوه فيها وترجوة هى الاخرى فينا عاوز اكتب ومش من عادتى الاطالة لكن هاقول لك
ان النفس كالطفل ان تهملة شب على حب الرضاع وان تفطمة ينفطم
تحياتى

 

البت ناثينج

ويخليكي ليا يا غاليه ومايحرمنيش منك ابدا


هاتي بوسه

ـــــــــــــــــــــــــ
الربان

اتفق معاك تماما في كل كلمه

ادعيلي الله يكرمك

ـــــــــــــــــــــــ
انكومبليت الجميله

كومنتك دا لم الموضوع كله ..وانا معاكي طبعا في كل كلمه ...مشكلتي فعلا اني بستضعف نفسي جدا رغم اني ببان العكس قدام الناس ..والناس كلها بتقول عني قويه ومفتريه ;)

بجد بحبك قوي ..وواثقه فيكي قوي قوي

ربنا يخليكي ليا

هاتي بوسه انتي كمان
ــــــــــــــــــــــ
بستوكتي

هاتي بوسه الاول عشان وحشتني زيارتك جدا

وماتحرمش منك يا جميله يارب

سلامي لطهقان
ـــــــــــــــــــــــــ

ذو النون المصري

علم ..وجاري البحث عنها :)

كان نفسي بجد تعلق علي البوست كله واعرف رأيك رغم اني عارفه انه كبير

معاك حق طبعا في النقطه اللي اتكلمت فيها ..واتفق معك تماما

___________________________
الراقص مع الذئاااااااااب

عااااااااااااااااااااااااااا

والله ما كنت اعرف انك ماشي علي طول كدا

خللي بالك من نفسك وفي انتظار عودتك ..وتعليقاتك اللي وحشتنا

___________________________
ريمووو الجميله

البوست واقعي تماما..كان نفسي اقولك انه فيه شئ مش واقعي ..بس فعلا كل نقطه اثارتها فيه واقعيه تماما

تقدري تقولي ان دا ملخص لحياتي ..او للجانب المظلم في حياتي وشخصيتي ..كنت في موود حسيت اني لازم احاسب نفسي ..كان نفسي نتصالح انا وهي ..بس كالعاده ..تم التأجيل لأجل غير مسمي

ممكن نصيحة انكومبليت تبقي فعاله ..هي حد عارفني كويس ..هاجرب عموما

ادعيلي انتي بس

__________________________
الطائر الحزين

معاك حق جدا في كلامك

واكيد هايكون في بوستات تانيه بيني وبين نفسي ..لحد ما نحل كل المشاكل ونتصالح سوي

أأمل ذلك

نورتني

 

العزيزة اجندا حمرا

البوست لأنه واقعي ..اكيد هايكون في شبه من ناس كتير
انتي وانا وريمو وغيرنا كتير
يمكن كونك تغيري معاييرك عشان موقف معين وانتي من جواكي عارفه انك بتعملي كدا عشان ترضي اللي بتحبيهم اهون ميت مرة من انك تعملي كدا وانتي تايهه وضايعه غي النص وساعاتها بتبقي شيفاها حاجه عاديه بس لما تحاسبي نفسك وتقفي موقف جد ..بتزعلي منها اوي

اكيد طبعا الاصحاب بيفرقوا كتير جدا مع الانسان في مواقف زعله وحزنه ..بيلاقي اللي بيخفف عنه واللي بيفرح معاه


كمان حلو جدا انك تتقبلي الناس زي ماهم ..انا كمان كدا ..وان كان في ناس كتير بتعارضني في دا ..بس كل واحد مرتاح بدماغه وطريقة تفكيرة

كومنتك جميل واثار اكتر من نقطه

تحياتي يا جميله ..ويارب تنورينا دايما

 

عزيزتي نون
طبعا انا متفقه معاكي في اللي قلتيه لما بنكون بنحب حد بنحاول نتغير حبه حبه عشانه عشان نعمله كل اللي هو عايزه و معاييرنا ساعتها بتختلف عن لما نحس اننا بنعمل كده و احنا تايهين
الأصحاب طبعا انا متفقه معاكي جدا الاصحاب اللي بجد اللي بيقفوا معانا في جميع اوقات حياتنا الحزن و الفرح و فعلا بيكونوا صحاب بحق و حقيقي مش صحاب مصلحه وقتيه و خلاص
انتي عارفه عزيزتي انا ليه بحاول اني اتقبل كل واحد زي ماهو؟عشان بحاول احط نفسي مكانه و مابحاولش اني احكم علي حد عشان ماحدش يجي في يوم من الايام و يحكم عليا حكم ظالم
مش معني ده برضو اني ملاك نازل من السما فيه شخصيات كتيره بقابلهم و مش بيعجبوني بس انا لما الموقف ده بتعرض له بحاول اخرج نفسي من المواضيع دي
صحيح مش بحكم علي حد بس لما مابيعجبنيش حد ماقدرش اضغط علي نفسي و ادخله في دايره صحابي بفضل اني ابتعد
انا في نظري اني ابعد احسن مليون مره من اني احط نفسي في مكان القاضي و ابتدي احكم علي الشخص ده
خصوصا لو كان جرحني
انا ممكن اسامح في حاجات كتيره بس عند كرامتي و ستوب عند اللعب بعواطفي ماقدرش اسامح
بشكرك انتي ياجميله علي كومنتك اللي برضو فتح مجالات تانيه ليا للكلام
تحياتي ليكي و ربنا يوفقك دايما في كل حاجه بتعمليها
و خاليكي دايما زي ماانتي متقبله للناس و ماتسمعيش للي بيتضايق من موقفك ده انتي صح و اللي بتعمليه عين العقل خاللي اللي يقول يقول
تحياتي ليكي ياجميله
:))))):)))))))