المرأة اعظم هدية قدمها الله الي الانسان
سقراط
حوار 1 الأب :يابني انا بكبر يوم بعد يوم ..وانت كبير العيله دي وكبير اخواتك من بعدي ازاي بس ولحد العمر دا مايبقالكشي ولد من صلبك يشيل اسمك واسمنا من بعدك ..اتجوز يابني لاهو عيب ولا حرام ..وانت كبير البلد والف واحده تتمناك انشالله تاخد بنت بنوت الأبن : يابه بعد السن دا ..دا انا عديت ال 55وبنتي كبرت وبقت عروسه ازاي بس اتجوز بعد العمر دا الأب : يابني هو انت هاتعمل حاجه حرام ..وبعدين ما انت كبرت ومراتك كبرت ومبقاش فيها للخلفه..خد واحده صغيرة تجيبلك الولد اللي نفسك فيه الأبن :يابا ولد ايه وبنت ايه ..مابنتي زي الفل وماشيه في تعليمها ولا الف واد..يعني هي لمنا تبقي دكتورة دا مش هايرفع اسم العيله ويبقي احسن من الف واد الأب : يابني الولد ولد بردو..عزوه وضهر وهي البت لو بقت دكتورة ولا حتي وزيرة ماهي في الاخر هاتبقي علي اسم جوزها ..وعيالها اللي هاتجيبها انشالله ميه ..هايبقوا لاهل جوزها وهايشيلوا اسمهم ..واحنا يابني اسمنا واسم عيلتنا هايروحوا في الارض ..دا انت كبيرنا وكبير البلد ..ازاي بس مايبقالكش ولد ..هو انت هاتعمل حاجه بطاله ..ولا انت اول ولا اخر من اتجوز..دا انت هاتتجوز علي سنة الله ورسوله ..وعروستك كمان عندي الأبن : طب ومراتي يابا وبنتي ..انا عارف انهم مش هايرضوا ابدا بالوضع دا الأب :هو اللي حلله ربنا فيه كلام ..مراتك لو مارضيتش براحتها ..اديك هاتتجوز غيرها وبنت بنوت كمان ..يعني هي اللي خسرانه لو خربت بيتها بايدها ..وبنتك اهي من دمك ولو مشيت علي هوا امها يومين ..مصيرها في الاخر لحضن ابوها بردو ..دا انت ابوها اللي بتحبه وروحها فيه ..ها قولت ايه ـــــــــــــــــــــــــــــــــــــــ حوار 2 الزوجه : بمنتهي الهدوء كدا طلقني ..انا مش هاعيش علي ذمتك يوم بعد اللي انت عملته الأخ : اهدي بس كدا واستهدي بالله ..وبعدين طلاق ايه وكلام فارغ ايه ..احنا معندناش ستات في العيله تطلق الزوج : قولها ..عقلها ..كل اللي جاي عليها الطلاق الطلاق ..كانه كلمه سهله !! الزوجه :بعد اللي عملته مش هاعيش علي دمتك يوم واحد ..انت انسان خاين الاخ : ياستي اهدي كدا بس واعقلي .. ان الله غفور رحيم ..اعقلي كدا وحافظي علي بيتك ماتخربيهوش بايدك الزوجه: وهو مافكرش يحافظ عليه ليه وبعدين دي مش اول مرة يعملها ..صبرت عليه مرة ..لكن المرة دي خلاص ..زهقت وقرفت ..كل مرة بقصه وبحكايه اوسخ من اللي قبلها الأخ : الست العاقله تحافظ علي بيتها ..ياستي عشان خاطر عيالك ..دا انتي عندك بنت ..يرضيكي يبقي اسمها ان امها مطلقه ..وانتي وسمعتك ..انتي فاكرة ان الناس هاتسيبك في حالك الزوجه : وفر كلامك اللي مالوش لزمه ..انا واخده قرار ومصممه عليه ..هاتطلق يعني هاتطلق الأخ : يعني مافيش فايده في الشيطان اللي راكب دماغك دا ..عايزة الناس تاكل وشنا ..لعلمك بقي لو اتطلقتي هاتقعدي في البيت ومافيش خروج من البيت ولا حتي للشغل..احنا مش ناقصين كلام الناس .. وبعدين ما تكبريش الموضوع اوي ..ما كل الرجاله بتعمل كدا ..وياستي ربنا غفور رحيم .دا ربنا بيغفر .والست العاقله تحافظ علي بيتها حتي لو جوزها فيه العبر .زدا مافيش ست عاقله ومتربيه تعمل عمايلك دي الزوجه :ربنا بيغفر!! لو كنت انا اللي عملت عملته السودا دي ..كنت هاتقولي ربنا بيغفر ..مش بعيد كنت انت ولا هو دبحتوني وكان هايبقي اسمه دفاع عن الشرف ..انا بقي حقي في الطلاق .. ومصممه عليه ــــــــــــــــــــــــــــــــــــــــ حوار 3 الموظف لزميله :دي نسيت نفسها واتجننت في عقلها ..هي هاتعمل علينا ريسه ولا ايه ..لا انا راجل وماينفعش معايا الكلام دا مش هاخد الاوامر وتمشيني ست علي اخر الزمن ..دا حتي ما يرضيش ربنا ..دا الرسول بيقول لن يفلح قوم ولو امرهم امرأه ..منك لله يا قاسم ياامين انت الي خليت اللي تسوي واللي ماتسواش تتحكم فينا ..انا تهزئني قدام الموظفين ..ايه يعني كام دوسيه لسه ماخلصوش ..هي الدنيا طارت ..فكراني مقطوع زيها لا ورايا بيت ولا عيال ..ماهي لو كان لها راجل يحكمها ..ماكنتش عملت فينا كدا ..ماهو لو كان ............................................................ ـــــــــــــــــــــــــــــــــــــــــ حوار 4 المساعد : بصراحه يافندم بعد الانتر فيو وبعد ماشفنا السي فيهات ..التلاته احسن من بعض ..يمكن دي اللغات عندها اكتر وخبرتها في المجال كمان اكتر ..بس طبعا الامر راجع لسيادتك ..سيادتك قررت تختار مين المدير ساهما : الشقرا ام جيبه قصيره ـــــــــــــــــــــــــــــــــــــــ
فنأسف للعطل الفني |
يعني ايه المرأة اعظم هدية قدمها الله للانسان
ما احنا انسان
امال احنا تصنيفنا ايه؟
وكأن الانسان هو الراجل بس