وقررت اخيرا امبارح اني هانزل اشتري لبس
طبعا الموضوع بالنسبه ليا مش اني هاشتري لبس ..قد ما اني هانزل ...اشوف الشارع والناس ..اخرج في الهوا ..بدل الحبس الانفرادي اللي انا قاعده فيه
المهم ..توكلنا علي الله واستغليت ان زوجي جه بدري امبارح من شغله .. وحزمنا الامتعه ..وسربت بنتين عند ماما واخدت التالته معايا
ونزلنـــــــــــــــــــــــــــا
ويارتنا ما نزلنا
واليكم التفاصيل
انا كنت عايزة اشتري Sportswear
نزلنا علي مدينة نصر .. وقدام المنصه لقينا العربيه نطت درجة حرارتها فجأه ل 130
بالكشف عليها اتضح ان زوجي العزيز نسي يزود ميه ..المهم طلع عنيناعلي ماعرفنا نجيب ميه ..وحلينا المشكله بسلام وامان ..
وكملنا طريقنا وكلنا تفاؤل ..عشان نشتري الحاجات
وعند اشارة رابعه ..اللي ورانا راح هووووب ..لابس فينا .. طبعا جوزي اتعفرت وخصوصا انه كان لسه مظبط العربيه ومغير الفوانيس والاكصدام ..نزل بص ..لقي الفانوس اليمين طار ..والاكصدام الجديد اتشرخ
فضل يبرطم بأن اليوم يوم غريب ..ومش عارف في ايه النهاردة ..واشياء من هذا القبيل
انا عماله اهدي فيه ..اقوله بلاش ننكد علي نفسنا ..انا مصدقت اني خرجت النهاردة
عشان خاطري ماتكشرش . .. اقوللك ..انا هاموت من الجوع تعالي ننزل علي وسط البلد نجيب باقي الحجات واعزمني علي تكا..وانا اعزمك علي ايس كريم
واتجهنا الي وسط البلد
واحنا في طريقنا موبايل جوزي رن
الوو..ايوة ..ازيك يامحمد عامل ايه ..ايه يابني ما بتسألش ليه ..في ايه ..ايه ..قسم ..قسم ايه ..مأذون ..مأذون ايه ..طب اهدي بس اهدي ..طب هاروح سارة ومروج واجيلك ..طب خلاص اهدي انا خمس دقايق واكون عندك
انا: في ايه ؟؟
زوجي : محمد بيقولي تعلالي في قسم الساحل حالا وهات معاك مأذون !!!
انا : ليه في ايه ؟
زوجي : معرفش في ايه ..استنيني انتي في العربيه ..هانزل اشوف في ايه ..لو لقيت الموضوع هايطول اروحك انتي ومروج وارجعله تاني
اتجهنا الي القسم ..لقينا صاحب جوزي واقف علي باب القسم ومعاه اتنين رجاله واتنين ستات ..المهم اتضح ان الاتنين الستات دول مراته وحماته ولالتنين الرجاله دول اخوه والمأذون
حوار طويل حصل قدام القسم ماسمعتش منه ولا كلمه ..لقيتهم بيقربوا ..بيسندوا علي العربيه..الراجل بيفتح دفتر .. بطايق وبيانات بتتاخد ..وتم الطلاق علي كبوت العربيه وانا بصه ومتنحه ومش فاهمه اي حاجه
خلصنا الموضوع ..جوزي ركب العربيه ..حساه مش طايق نفسه سألته بصوت واطي:.احنا هنعمل ايه دلوقتي قالي بزهق :انتي مش بتقولي جعانه واكيد تعبانه من اللف ومش هاتقدري تحضري عشا ..نروح اي حته نتعشا ..ونروح ..خلاص مافيش وقت اننا نشتري اي حاجه تانيه
انا : طيب ..ماشي وحمدت ربنا في سري ان الامور جت علي قد كدا المهم قولنا ننزل شارع شبرا نجيب كنتاكي ولا كشري حتي ونروح علي البيت
طبعا في طريقنا كان لازم نمر باشارة الخلفاوي واشارة الخلفاوي_لمن لا يعرف_ من اغلس واطول الاشارات اللي ممكن تقف فيها وغالبا بتبقي زحمه ال 24 ساعه ..سواء بالعربيات او بياعين الفل والمناديل ولعب الاطفال والمتسولين
المهم عشان ما اطولش عليكم ..قولوا طولي
واحنا واقفين في الاشارة لقينا راجل عجوز بيخبط علي الشباك جمب جوزي وبيشاورله افتح
نزل الازاز ودار الحوار التالي
الراجل العجوز : انت طلعت زكاة رمضان ؟
زوجي : اشمعني يعني !!
الراجل العجوز : مش لازم تزكي علي نفسك ومالك ..ولا انتو تنهبوا حق الغلابه بس
زوجي : ياسيدي مين قالك اننا بننهب حق الغلابه ..انت عايز ايه دلوقتي ؟
الراجل العجوز: عايز حسنه من زكاة رمضان
انا طبعا واقعه علي الارض من الضحك
زوجي : ربنا يسهلك الراجل العجوز: يعني مش هتديني حسنه زوجي :ربنا يسهللك!!
الراجل العجوز: امال قاعدلي كدا في العربيه كيف السبع واللي يشوفك يقول ياما هنا ياما هناك ..ومش عايز تديني حسنه
زوجي طبعا تنح من رد الفعل بتاع الراجل ومش عارف يعمل ايه ..دا راجل كبير يعني مش معقول هيتخانق معاه ولا يهزءه
انا والحوار استفزني جدا :انت عايز ايه دلوقتي ؟؟ الراجل العجوز : عايز حسنه
انا : ربنا يسهلك ياسيدي..اتكل علي الله
الراجل العجوز : روحوا ربنا مايبارك لكم
طبعا كنت هامد ايدي اجيبه من زمارة رقبته لولا زوجي اللي بصلي ..ما تتكلميش
زوجي : ياعم انت راجل كبير وانا مش عايز اغلط فيك علي المسا ..ربنا يسهلك
انا : ياللا ياعم ربنا يسهلك . مش عايزين جر شكل علي المسا في يومك الزفت دا
الراجل العجوز بصوت عالي :انتي بتتكلمي ليه انتي؟ ماتشوفي نفسك بدل ما انتي بتتسرمحي برة بيتكم لحد نص الليل _ الساعه كانت 11
تقريبا _ استر علي ولايانا يارب
طبعا انا الدم غلي في عروقي وزوجي حساه هايجيب الراجل من قفاه والاشارة فتحت والكلكسات اشتغلت
انا وبدأت اتجنن خلاص: تصدق انك راجل مهزء فعلا ..انا مراته يابني ادم
الراجل العجوز وهو بيبعد : مراته ايه بس ياشيخه ..بلا مراته بلا كلام فاضي
طبعا انا بقيت اتشال واتهبد ..وجوزي حساه هايمسك الراجل يموته ركنا علي جمب ونزلناله والناس بدأت تتفرج علينا
زوجي : تعالي هنا ياراجل انت
الراجل العجوز :ياعم اسكت بقي وخليك في االلي انت فيه انت والسنيورة اللي معاك
زوجي وبقي بيطلع شرار من عنيه : اخلينا في اللي احنا فيه ايه يا راجل يا مهزء انت
مع ملاحظة ان جوزي كان بيسوق وانا علي الكرسي اللي جمبه وروجا بنتي علي رجلي بأكلها نايتي:)
جه عسكري المرور عشان يشوف في ايه
العسكري: في ايه يابيه؟
زوجي: الراجل المجنون دا..يا اما اديله حسنه ..يااما يقل ادبه ويعك في الكلام عسكري المرور: وبعدين يا حسنين ..انت مش هاتجيبها لبر
معلش يابيه ..اصل عقله علي قده
معلش يا انسه احنا اسفين
جوزي وحساه خلاص هايتجنن: انسه مين ياعم ..دي مراتي
العسكري وهو بيبعد : .....خلاص يابيه براحه ماتشخطش هو ما قدرش علي الحمار ولا ايه
جوزي :اركبي خلينا نغور قبل ما اصور جنايه هن انا : طب والعشا يا حبيبي جوزي : ابقي اتعشي جبنه وزتون ..قدامي علي البيت
NONE |
