فاكرة زمان وانا صغيرة ..يوم استطلاع هلال رمضان ..كنا بنبقي قاعدين قدام التليفزيون انا وماما وبابا ..مستنيه المفتي لما ينطق ويقول رمضان بكرة ..كنت بفرح اوي لما رمضان يطلع بكرة ..وبزعل اوي لو طلع بعد بكرة ..بس كنت بقول لنفسي بعد كدا ان دي حاجه كويسه لأنه كدا مش هايخلص بسرعه زي ماهايخلص لو كان بكرة ... دلوقتي مش بقيت اتفرج علي المفتي وهو بيقول استطلاع الهلال ..بقيت اسمعه في النشرة او اعرفه من الناس الللي بيقولولي كل سنه وانتي طيبه... وانا صغيرةكنت بقف مع ماما في المطبخ اتفرج عليها وهي بتحضر الفطار ..كانت تقوم الصبح تدخل المطبخ ماتخرجش منه غير قبل الفطار..كانت بتعمل كل حاجه باستمتاع وبحسها فرحانه وهي بتحضرها .. طب ليه انا لما بقف دلوقتي في المطبخ احضر الفطار مش ببقي سعيدة وفرحانه زيها ..ليه ببقي شايله هم تحضير السفرة والفطار كل يوم _بالذات مع طقوس زوجي في اصناف الفطار واللي لازم يبتديها بالشوربه وبعدين القطايف بالجبنه والسلطات وبعدين البوفتيك او البانيه والبطاطس الشيبس اللي لازم تكون معموله في البيت وبعدين الطبق الرئيسي ويختمهابالبلح.. وبعدها بساعه يقولي امال فين الحلو _
بعد الفطار كان عمي بيجيلنا وساعات خالي ومعاهم ولادهم وينزلوا مع بابا يصلوا التراويح ..ونقعد احنا نلعب بالفوانيس ام شمعه في البلكونه او علي السلم ..وساعات لو ماما راحت صلت كنت بروح معاها دلوقتي بعد الفطار ..بنترزع قدام التليفزيون نتفرج علي المسلسلات ثم المسلسلات فالمسلسلات _وانا اصلا بكرة المسلسلات وماليش طولت بال عليها _ دا حتي مابقاش فيه الف ليله وليله زي زمان..وننزل نصلي التراويح ونرجع تاني نكمل المسلسلات واللي حارق دمي انها كانت قناه واحدة للمسلسلات ..لأ في رمضان بقوا اتنين ..قال يعني كانت ناقصه والفوانيس ام شمعه انقرضت وبقت مسوخ ..حصان وعربيه وعرايس بتغني وترقص كمان
وانا صغيرة كنت بنط اقعد علي السفرة نفسها _ علي التربيزة _عشان اطول الاصناف كلها واكل منها ..ونبقي مشغلين الراديو وقت الفطار اسمع المدفع والاذان والفزورة وبعدين اشغل التليفزيون عشان اتفرج علي بوجي وطمطم وعمو فؤاد دلوقتي الافلام والقنوات كترت والراديو انقرض ..والواحد لابقي عارف يشوف حاجه ولا يسمع حاجه ولا يستمتع بحاجه
الحاجه الوحيده اللي متغيرتش جوايا ..فرحتي برمضان ..واحساسي بروايحه اللي بشمها في الهوا اللي بتنفسه ..واحساسي بفرحته لو مشيت في الشارع وشوفت الزينه والانوار ..والطاقه الايمانيه اللي بحس ان الصيام بيمدني بيها ..واحساس السلام والامان اللي جوايا واني لربنا اقرب .. والعاده اللي فضلت معايا من زمان لحد دلوقتي ..اني لازم اقف في البلكونه واشوف المسحراتي وهو بيعدي وبيسحر الناس ..ببقي من جوايا خايفه لينقرض هو كمان ويضيع زي الحجات الحلوة الصغيرة البسيطه اللي كنت بحبها وبستمتع بيها زمان
ادعولي اعرف استمتع برمضان دا ....
ورمضان كريم عليكم كلكم
none
|
